Норвешка го освои „евровизискиот микрофон“

17.05.2009 08:52

Александар Рибак

Норвешка победи на изборот за најдобра песна на Евровизија што се одржа во Москва, и со тоа оваа скандинавска земја догодина ќе биде домаќин на Евросонгот.

Норвешкиот претставник Александар Рибак, по потекло од Белорусија, настапи со песната „Бајка“ (Fairytale) и убедливо го освои првото место со 387 бодови, речиси двојно повеќе од второпласираниот Исланд.

Меѓу првите пет, според гласовите на гледачите и стручните жирија, се пласираа и Азербејџан, Турција и Велика Британија.

На Евросонгот учествуваа 42 држави, а во финалето се пласираа песните од 25 земји.

Домаќини на финалето што во саботата вечер се одржа во московската арена беа популарната руска пејачка Алса и тв-водителот Иван Ургант.

Македонскиот претставник на годинешната Евровизија групата Некст тајм не успеа да се пласира во финалето.